வீட்டைக் கட்டுவதற்குமுன் அதற்கான வரவுசெலவு திட்டத்தை முடிவுசெய்வதுதான் முக்கியமான வேலை. அப்படிமுடிவுசெய்வதால், வீடு கட்டும்போது ஏற்படும் நிதி நெருக்கடியைத் தடுக்கலாம். அத்துடன், பட்ஜெட்டை முன்பே தீர்மானித்துவிட்டால் தேவையில்லாத விஷயங்களுக்குச் செய்யப்படும் செலவுகளும் குறையும். வீட்டின் வடிவமைப்பு, கட்டமைப்பில் சில முன்னேற்பாடுகள், சீரான கட்டமைப்பு செயல்முறை போன்ற அம்சங்களைக் கணக்கில் எடுத்துக்கொண்டாலே திட்டமிட்ட பட்ஜெட்டில் வீட்டைக் கட்டிமுடித்துவிடலாம். பட்ஜெட்க்குள் வீட்டைக் கட்டிமுடிப்பதற்கான சில ஆலோசனைகள். இந்த பதிவை பற்றிய முழு விவரமும், வீடியோ பதிவும் அதில் அடங்கி உள்ள குறிப்புகளும் கீழே கொடுக்கப்பட்டுள்ளது.
புதிதாக ஒரு வீட்டைக் கட்டும்போது ஏற்படும் அனைத்து தேவைகளுக்கும் முன்னுரிமை கொடுத்து இந்த பட்ஜெட்டை அமைக்க வேண்டும். அதிலும் கட்டாயமாகத் தேவைப்படும் விஷயங்களுக்கு கூடுதல் முக்கியத்துவம் அளிக்க வேண்டும். வீடு கட்டுவதற்கு நிலத்தை வாங்கியவுடன், கட்டிட ஒப்புதலுக்கான செலவு, கட்டிடக் கலைஞரின் கட்டணம், கட்டிடத் தொழிலாளர்களின் கட்டணம் போன்றவற்றை வீட்டின் சதுரஅடிக்கு ஏற்பத் திட்டமிடுங்கள். மணல் சோதனை, தரப்படுத்துதல், செப்பனிடுதல் போன்றவையும் இந்தச் செலவில் அடங்கவேண்டும்.
ஒரு வீட்டின் பட்ஜெட் என்பது அந்த வீட்டின் வடிமைப்பைப் பொருத்துதான் அமையும். அதனால், இந்த அம்சத்தை முதலில் முடிவுசெய்ய வேண்டும். வளைவுகளுடன்கூடிய அறைகளை வடிவமைக்கும்போது அதற்கான கட்டுமானச் செலவும் தொழிலாளர் செலவும் அதிகரிக்கும். கூடுமானவரை எளிமையான வடிவமைப்பைத் தேர்ந்தெடுப்பது வீட்டின் கட்டுமான செலவைக் குறைக்கும். அத்துடன், பயன்பாட்டுக்குரிய அறைகளை மட்டும் அமைப்பதும், அவற்றைச் சரியாக இணைப்பதும் நல்லது. இப்போது, வீட்டின் கட்டுமானச் செலவைக் குறைக்க நினைக்கும் பலரும் திறந்தவெளி வீட்டுத் திட்டத்தைப் பயன்படுத்துகிறார்கள். இந்தத் திட்டத்தில் வீடு கட்டுவதால் சுவர்கள், பகுப்பான்கள் போன்றவற்றின் தேவையிருக்கும். அத்துடன் கட்டுமான நேரம் குறைவதுடன், விளக்குகள், இறுதிக்கட்ட கட்டுமானம் போன்ற செலவுகளும் கணிசமாகப் குறையும்.
அலங்காரமான வடிவமைப்பு எப்போதும் செலவை அதிகரிக்கும். அதனால் அலங்கார வடிவமைப்பைத் தேர்ந்தெடுக்கும்போது, வடிவமைப்பாளரின் ஆலோசனைசெய்து, உங்கள் பட்ஜெட்டுக்குள் இருக்கும் வடிவைமைப்புகளைத் தேர்ந்தெடுப்பது நல்லது. இந்த வடிவமைப்புச் செலவுக்குள் ‘ஹார்டுவேர்’, மற்ற வடிவமைப்பு பொருட்கள் போன்றவற்றையும் சேர்த்துக்கொள்ளவும். வீட்டின் உட்புற அலங்காரத்துக்கான செலவில் இறுதிக்கட்டத்தில் மாற்றம் ஏற்படும் என்பதால் அதற்கேற்ப அந்தச் செலவைத் திட்டமிடுங்கள். கடைசி நேரத்தில் எதிர்பாராத செலவுகளுக்காக ஒரு தொகையை ஒதுக்கிவையுங்கள். கட்டமைப்பு செலவுளை ஒன்றுக்கும் மேற்பட்ட துறை சார்ந்த நபர்களிடம் கேட்டு ஒப்பிட்டுப்பார்த்தபின் முடிவுசெய்துகொள்ளுங்கள்.
முழு வீடியோ பதிவு கிழே உள்ளது .